Kuvendi i Kosovës do të mbajë sot dy seanca plenare, ku do të shqyrtohen disa çështje me rëndësi për institucionet dhe publikun.
Njëra nga pikat kryesore në rendin e ditës është rishqyrtimi i Ligjit për Dhomat e Specializuara dhe Zyrën e Prokurorit të Specializuar, i cili është kthyer nga presidentja për rishikim.
Seanca e parë, vazhdim i seancës së mëparshme, pritet të fillojë në orën 10:00.
Në këtë seancë do të diskutohen tri çështje kryesore: gjendja në sektorin e shëndetësisë, furnizimi dhe çmimi i energjisë elektrike, si dhe ndryshimet e propozuara në Ligjin për Dhomat e Specializuara.
Gjatë kësaj seance, deputetët pritet të votojnë një rezolutë lidhur me gjendjen në shëndetësi, pas interpelancës me ministrin Arben Vitia.
Kjo rezolutë lidhet me rastin e një pacienteje me kancer të gjirit, e cila kishte mbetur për katër muaj pa terapi, si dhe me mungesën e barnave onkologjike.
Po ashtu, do të jetë në votim një propozim-rezolutë që buron nga mocioni përmbajtjesor në lidhje me planifikimin, çmimin dhe furnizimin me energji elektrike në Kosovë.
Një nga çështjet më të rëndësishme të kësaj seance është shqyrtimi i Ligjit nr. 11/L-001 për ndryshimin dhe plotësimin e Ligjit për Dhomat e Specializuara dhe Zyrën e Prokurorit të Specializuar.
Ky ligj është kthyer nga presidentja për rishqyrtim dhe ka si synim kufizimin e mandatit të Gjykatës Speciale.
Burimi origjinal i informacionit: zeri .info

