Në kuadër të zbatimit të Planit Vjetor të Auditimit për vitet 2026-2027, Zyra Kombëtare e Auditimit (ZKA) ka filluar auditimin e performancës me temën “Efektiviteti i monitorimit dhe mbikëqyrjes së furnizimit me ujë të pijshëm” për periudhën nga janari 2024 deri në shtator 2026.
Qëllimi i këtij auditimi është të vlerësojë efektivitetin e masave të institucioneve përgjegjëse për sigurimin e qasjes në shërbimet publike të ujësjellësit, vazhdimësinë e furnizimit, si dhe identifikimin dhe trajtimin me kohë të rreziqeve që mund të cenojnë sigurinë e ujit të pijshëm.
Fushëveprimi i auditimit do të përfshijë Autoritetin Rregullator për Shërbimet e Ujit (ARRU), ndërsa si raste studimi janë përzgjedhur Kompania Rajonale e Ujësjellësit “Prishtina” dhe Kompania Rajonale e Ujësjellësit “Hidroregjioni Jugor”.
Gjithashtu, auditimi do të përfshijë edhe proceset përkatëse të monitorimit të cilësisë së ujit nga Instituti Kombëtar i Shëndetësisë Publike të Kosovës (IKShPK).
Ky auditim po realizohet në koordinim me Iniciativën për Zhvillim të INTOSAI-t (IDI) dhe është në përputhje me Objektivin 6 të Zhvillimit të Qëndrueshëm, i cili synon sigurimin e qasjes në ujë të pijshëm të sigurt për të gjithë.
Burimi origjinal i informacionit: zeri .info

