Artan Alija, nga organizata “The Strategy Group” në Washington, ka theksuar se paqartësitë lidhur me Ligjin për Gjykatën Speciale vazhdojnë që nga fillimi i kësaj çështjeje.
Ai e vlerëson tërheqjen e ligjit si një rezultat të presionit ndërkombëtar.
Alija ka shprehur se procesi duhet të rikthehet në pikën zero dhe të diskutohet në bashkëpunim me partnerët ndërkombëtarë, për të shmangur paqartësitë dhe veprimet procedurale që mund të komplikojnë situatën. “Mendoj që konfuzioni po vazhdon, jemi përballë me këtë konfuzion prej ditës së parë që ka nisur dhe e njëjta po vazhdon edhe tash.
Mendoj që ajo që vlen është se prej ditës së parë ka pasur presion të madh ndërkombëtar dhe i njëjti po vazhdon ende.
Kjo besoj është rezultat i asaj se pse është tërhequr ligji apo është kthyer mbrapa”, ka thënë ai.
Ai ka theksuar se është e nevojshme të shmangen veprimet e paqarta lidhur me këtë ligj dhe ka shprehur mendimin se vazhdimi i procedurave me të njëjtin tekst mund të jetë i pamundur. “Ajo që mendoj se duhet të bëhet tash është të mos ketë lojëra më me këtë ligj.
Mendoj që proceduralisht do të jetë e pamundur të vazhdohet me këtë ligj.
I njëjti mendoj që duhet të kthehet në pikën zero dhe njëkohësisht të diskutohet me ndërkombëtarët”, ka deklaruar Alija.
Ai gjithashtu ka kërkuar kujdes në deklaratat që lidhen me gjykatat ndërkombëtare dhe drejtësinë, duke përmendur reagimet e mëhershme të përfaqësuesve ndërkombëtarë lidhur me këtë ligj.
Alija ka theksuar se publiku duhet të ketë më shumë informacion në lidhje me zhvillimet rreth kësaj çështjeje dhe ka kërkuar më shumë transparencë nga grupi punues i Qeverisë. “Megjithatë, duhet të jemi shumë të kujdesshëm kur flasim për gjykata ndërkombëtare e drejtësi, pasi kemi parë edhe shumë deklarime të ndërkombëtarëve lidhur me ligjin.
Por ka paqartësi të mëdha dhe publiku meriton të jetë më i qartë lidhur me këtë çështje, ashtu siç edhe grupi punues qeveritar duhet të bëjë më shumë punë e të ndajë më shumë me publikun”, ka përfunduar Alija.
Burimi origjinal i informacionit: zeri .info
