Disa shtetas të huaj janë midis personave të vrarë dhe të plagosur nga të shtënat me armë zjarri që ndodhën pasditen e së shtunës në Krakov, qyteti i dytë më i madh në Poloni.
Autoritetet kanë bërë të ditur se Ministri i Brendshëm i Polonisë, Marcin Kierwiński, ka konfirmuar se një shtetas i huaj është në mesin e gjashtë viktimave, ndërsa pesë shtetas të tjerë të huaj janë midis 16 personave të plagosur.
Më herët, zyrtarët konfirmuan se katër gra dhe dy burra humbën jetën nga sulmi.
Po ashtu, komandanti i përgjithshëm i Policisë së Polonisë, Marek Boron, theksoi se një shtetas britanik është ndër viktimat.
Ministria e Punëve të Jashtme e Portugalisë njoftoi gjithashtu se një shtetas portugez është në mesin e të plagosurve.
Sipas policisë rajonale, rreth orës 15:00, një person hyri me automjet në Sheshin Kryesor të qytetit dhe hapi zjarr në drejtim të njerëzve që ndodheshin aty, duke qëlluar në mënyrë të rastësishme.
Krakovi, i pozicionuar në jug të Polonisë, është një nga destinacionet më të vizituara turistike në vend, ku çdo vit mbërrijnë miliona turistë.
