Rusia ka realizuar një sulm me raketa ndaj kryeqytetit ukrainas, Kiev, gjatë orëve të para të së shtunës, duke shkaktuar dëme në disa ndërtesa banimi dhe një kopsht fëmijësh.
Si pasojë e këtij sulmi, dy persona kanë mbetur të plagosur.
Kryetari i Kievit, Vitaliy Klitschko, njoftoi se shpërthime janë dëgjuar në periferi të qytetit, ndërsa forcat ruse kanë përdorur raketat balistike për këtë sulm.
Sipas autoriteteve lokale, mbetjet e raketave kanë goditur një ndërtesë pesëkatëshe në pjesën perëndimore të kryeqytetit, duke shkaktuar dëme edhe në fasadën e një ndërtese tjetër, si dhe në një objekt ku funksionon një kopsht fëmijësh.
Administrata Ushtarake e Kievit konfirmoi se dy persona janë plagosur si pasojë e këtij sulmi, duke u bërë thirrje banorëve që të qëndrojnë në strehimore për shkak të rrezikut të goditjeve të tjera.
Në mes të kësaj situate, presidenti ukrainas, Volodymyr Zelensky, kishte paralajmëruar se Rusia po përgatit sulme të reja ndaj infrastrukturës energjetike, urave dhe objekteve të tjera strategjike.
