Shtetet e Bashkuara kanë realizuar sulme të reja ndaj Iranit, duke shënjestruar një pajisje të mbrojtjes kundërajrore, siç ka njoftuar presidenti amerikan, Donald Trump.
Duke folur për gazetarët të premten, Trumpi theksoi se ushtria amerikane e kishte shkatërruar pajisjen brenda disa minutash. “Ata kishin vendosur një lloj pajisjeje kundërajrore, ndërsa ne e shkatërruam për rreth 15 minuta, ndoshta edhe për pesë minuta”, deklaroi Trumpi, duke e cilësuar këtë operacion si një sulm të kufizuar.
Mediat shtetërore iraniane raportuan për dy shpërthime në ishullin Qeshm, që ndodhet në Ngushticën e Hormuzit, një nga korridoret më të rëndësishme detare për transportin e naftës në botë.
Këto sulme të reja vijnë pas një operacioni të ngjashëm amerikan të hënën, kur shpërthime u raportuan gjithashtu në ishujt Qeshm dhe Hengam, si dhe në qytetin bregdetar Bandar Abbas.
Pavarësisht përshkallëzimit të situatës, Trumpi njoftoi se komunikimet me Teheranin vazhdojnë. “Ne po flasim me Iranin.
Po flasim gjatë gjithë kohës”, tha presidenti amerikan, pa ofruar detaje të tjera për përmbajtjen e bisedimeve.
Programi bërthamor iranian mbetet një nga pengesat kryesore për arritjen e një marrëveshjeje, pasi Uashingtoni kërkon që ky çështje të përfshihet në çdo zgjidhje të konfliktit.
Në mes të kësaj situate, Komanda Qendrore Amerikane (CENTCOM) ka ofruar një shpërblim deri në 20 milionë dollarë për informacione që ndihmojnë në identifikimin e objekteve, pajisjeve dhe personelit të lidhur me programin bërthamor të Iranit.
