Sigal Prishtina ka arritur një fitore emocionuese në derbin e madh ndaj Pejës, duke e mposhtur me rezultatin 79-80 në një ndeshje dramatike që u vendos në sekondat e fundit, falë një tresheje vendimtare nga Arbër Sinani.
Përballja e zhvilluar në palestrën “Karagaçi” ishte e mbushur me tension dhe rivalitet, ndërsa në çerekun e katërt ndeshja u ndërpre për disa minuta pas hedhjes së një mjeti plasës në afërsi të bankës së Sigal Prishtinës.
Gjatë këtij incidenti, tensionet u rritën mes shikuesve pejanë dhe basketbollistit Malcolm Armstead.
Pas ndërprerjes, ndeshja rifilloi dhe skuadrat vazhduan luftën për fitore, me Prishtinën që arriti të triumfojë me vetëm një pikë diferencë.
Te Peja, lojtari më i dalluar ishte Xavier Johnson, i cili regjistroi 18 pikë dhe 11 kërcime.
Në debutimin e tij, Dominic Artis pati një paraqitje solide me 16 pikë dhe 6 kërcime.
Me pikë dyshifrore te skuadra pejanë kontribuuan edhe Gary Ricks me 14 pikë dhe Daquan Bracey me 11.
Në anën tjetër, Bryson Dawkins ishte më efikasi te Sigal Prishtina me 21 pikë dhe 11 kërcime.
Paraqitje të mira patën gjithashtu Malcolm Armstead me 15 pikë e 5 kërcime, Vincent Golson me 14 pikë, si dhe Arbër Sinani me 11 pikë, duke përfshirë treshen vendimtare që i siguroi fitoren skuadrës kryeqytetase.
