Në diskutimin e zhvilluar në Bruksel për planin e rritjes, drejtori për zgjerimin Gert Jan Koopman theksoi se shtetet ballkanike kanë shfrytëzuar vetëm 673.6 milionë euro nga paketa financiare totale prej 6 miliardë eurosh për këtë rajon.
Shqipëria është renditur si performuesja më e mirë në realizimin e reformave, duke siguruar mbi 212.8 milionë euro nga rreth 922 milionë euro të planifikuara në total.
Maqedonia e Veriut ka përfituar tashmë 142.1 milionë €, Serbia 167.5 milionë €, Mali i Zi 91.2 milionë € dhe Kosova 61.8 milionë €. “Mali i Zi dhe Shqipëria kanë arritur një shkallë zbatimi prej afro 90% të reformave të kërkuara nga plani i rritjes.
Kjo nuk është për t’u habitur, pasi pasqyron përparimin e tyre në rrugëtimin drejt anëtarësimit në Bashkimin Evropian.
Kohët e fundit, Maqedonia e Veriut ka përparuar me hapa të shpejtë, dhe sipas vlerësimeve tona, do të kalojë shifrën 50%.
Serbia ka arritur një shkallë zbatimi prej rreth 42%.
Kosova e ratifikoi kornizën e nevojshme ligjore vetëm në pranverën e këtij viti.
Për Bosnjë-Hercegovinën, ekziston rreziku real i humbjes së rreth 300 milionë eurove”, tha drejtori për zgjerimin në BE, Gert Jan Koopman.
Aktualisht, Brukseli po shqyrton mundësinë e ofrimit të një fondi shtesë për tre shtetet që kryesojnë, Malin e Zi, Shqipërinë dhe Maqedoninë e Veriut, në këmbim të reformave shtesë. “Shtetet kandidate duhet të vijojnë zbatimin e reformave thelbësore, sidomos në sistemin e drejtësisë.
Nëse reformat nuk realizohen brenda kësaj periudhe, atëherë fondet mund t’u rialokohen shteteve të tjera më të suksesshme.
Aktualisht po vlerësojmë mundësinë e ofrimit të një fondi shtesë për tre shtetet që kryesojnë, Malin e Zi, Shqipërinë dhe Maqedoninë e Veriut, sigurisht në këmbim të reformave shtesë.
Në këtë botë, asgjë nuk është falas”, theksoi Koopman.
Me planin e Rritjes, Bashkimi Evropian synon që të dyfishojë ekonomitë e shteteve ballkanike gjatë dhjetë viteve të ardhshme.
Disbursimi i fondeve do të vijojë të jetë i kushtëzuar nga përmbushja e reformave të integrimit, ndërsa në rastin e Serbisë, edhe nga përparimi në dialogun me Kosovën.
Burimi origjinal i informacionit: zeri .info
