Lista Studentore në Serbi ka prezantuar një program me propozime për ndryshimin e kushteve të punës, pagave dhe të drejtave sociale të punëtorëve.
Një nga masat kryesore është implementimi i javës katërditore të punës pa ulje të pagës.
Sipas programit të titulluar “Puna dhe Çështjet Sociale”, punëdhënësit që do të zgjidhnin këtë model do të kenë mundësinë të organizojnë punën në katër ditë, duke punuar gjithsej 32 orë në javë, ndërsa punëtorët do të vazhdojnë të marrin pagën e plotë, siç raportohet.
Megjithatë, kjo masë nuk do të jetë e detyrueshme për të gjithë punëdhënësit, por do të zbatohet nga ata që vendosin të përvetësojnë këtë mënyrë të organizimit të punës.
Një propozim tjetër ka të bëjë me kufizimin e kontratave me afat të caktuar në maksimumi 12 muaj.
Pas kësaj periudhe, punëtorët do të kenë mundësinë të përfitojnë kontratë me afat të pacaktuar.
Programi gjithashtu parasheh mbrojtje më të madhe nga largimi i padrejtë nga puna, si dhe masa kundër detyrimit të punëtorëve për të nënshkruar marrëveshje për ndërprerjen e kontratës.
Lista Studentore propozon gjithashtu rritjen e kompensimeve për kushte të veçanta të punës.
Sipas propozimit, shtesat minimale do të ishin: Parashihet që kompensimi për ushqim gjatë punës të jetë së paku 10 për qind e pagës mesatare te punëdhënësi, ndërsa regresi të arrijë së paku vlerën e një page mesatare.
Propozimet përfshijnë gjithashtu ndryshime në të drejtat prindërore.
Gratë që kanë qenë të punësuara para shtatzënisë do të përfitojnë të drejtën e pushimit të lehonisë, pavarësisht llojit të kontratës së punës.
Për baballarët propozohet pushim tre-mujor pas lindjes së fëmijës.
Ndërkohë, për pushimin mjekësor gjatë 30 ditëve të para, propozohet kompensim prej së paku 75 për qind të pagës përkatëse.
Programi parasheh gjithashtu të drejtën e punëtorëve për të mos iu përgjigjur kërkesave të punës pas përfundimit të orarit zyrtar.
Ndryshimet e propozuara përfshijnë edhe sistemin pensional.
Lista Studentore kërkon harmonizimin e pensioneve dy herë në vit, rritjen e të ardhurave për pensionistët me pensione më të ulëta dhe vendosjen e pensionit social për personat mbi 65 vjeç që nuk kanë stazh të mjaftueshëm për pension.
Po ashtu, propozohet heqja e penalizimeve për pensionimin e parakohshëm në raste të caktuara, varësisht nga vitet e stazhit të punës.
Programi përfshin edhe masa për rritjen e mbrojtjes së punëtorëve të angazhuar përmes platformave digjitale, agjencive dhe formave të tjera jo tradicionale të punësimit.
