Me rastin e 10-vjetorit të vdekjes së aktivistit Astrit Dehari, është mbajtur një akademi përkujtimore, ku kryeministri Albin Kurti, bashkëaktivistë, miq dhe bashkëvendës të Deharit janë mbledhur për të kujtuar jetën dhe veprimtarinë e tij, duke kërkuar drejtësi dhe zbardhjen e plotë të rrethanave të vdekjes.
Kryeministri Kurti theksoi se Astrit Dehari ishte mbajtur në paraburgim për 68 ditë, pa aktakuzë, pa gjykim dhe pa u marrë ndonjëherë në pyetje. “Astrit Dehari ishte i paraburgosur pa aktakuzë, pa gjykim, pa dënim, dhe për 68 ditë në burg nuk u mor fare në pyetje.
Megjithatë, në qelinë A3 të burgut të Prizrenit, e mbytën,” tha Kurti.
Ai shtoi se, “Sot, 10 vjet më vonë, ne ende nuk e dimë emrin e vrasësit, ndërkohë që pesë prokurorë janë ndërruar përgjatë rastit.” Kryeministri përmendi gjithashtu raportet e autopsisë dhe atë të Institutit Zviceran nga Lozana, të cilat përjashtojnë mundësinë e vetëvrasjes së Deharit.
Ish-aktivisti Egzon Haliti, shok i fëmijërisë së Deharit, kujtoi solidaritetin dhe përkushtimin e tij në kthimin e bindjeve politike në veprime konkrete. “Përveç se ka qenë jashtëzakonisht solidar dhe njerëzor, Astriti ka pasur thellësi dhe bindje të forta politike, të cilat i vëreja nga diskutimet e përditshme dhe literatura e ndryshme që m’i propozonte për lexim,” tha Haliti.
Ai theksoi se kujtimi për Deharin nuk duhet të mbetet vetëm në nivelin e ceremonive përkujtimore, por të shërbejë për vazhdimin e angazhimit për vlerat që ai përfaqësonte.
Bashkëvendësi Destan Hajdini kujtoi angazhimin politik të Deharit që në moshë të re, si dhe periudhën e qëndrimit të tij në paraburgim. “Sot po përkujtojmë dhjetëvjetorin e vrasjes së Astritit, i cili u arrestua më 13 gusht 2016 pa ngritje aktakuze.
Pa ngritje të aktakuzës, në procesin hetimor, në ditën e 67-të u privua nga jeta Astriti,” tha Hajdini.
Ai përmendi gjithashtu përkushtimin e Deharit në aktivitetet kombëtare dhe politike.
Shoqja dhe bashkëaktivistja Rine Zhitia kujtoi mënyrën se si Astriti i afronte aktivistët e rinj dhe përkushtimin e tij ndaj njerëzve. “Ishte student i dalluar, me pasion të madh për mjekësinë, për të cilin aktivizmi politik e shëndetësia ishin forma të ndryshme të së njëjtës përkujdesje për njeriun,” tha Zhitia. “Astritin do e kujtojmë gjithmonë me dashuri.
E po me atë këmbëngulje do vazhdojmë të kërkojmë drejtësi për të,” shtoi ajo.
Pas përfundimit të akademisë përkujtimore, kryeministri Albin Kurti, së bashku me anëtarë të Lëvizjes Vetëvendosje, ndezën qirinj pranë muralit “Astrit Dehari”.
Gjatë ditës, ai, së bashku me prindërit e Astrit Deharit, Avniun dhe Xhemilen, familjarë, kolegë dhe aktivistë të Lëvizjes Vetëvendosje, bënë homazhe te varri i Astritit, në 10-vjetorin e vdekjes së tij.
Burimi origjinal i informacionit: zeri .info
