Real Madridi ka filluar të mendojë për të ardhmen e portës, duke pasur parasysh se Thibaut Courtois po i afrohet fazës së fundit të karrierës së tij.
Një nga portierët që është nën vëzhgimin e klubit madrilen është hollandezi Bart Verbruggen, i cili aktualisht luan për Brightonin.
Sipas gazetës gjermane Sport Bild, gazetari Ben Fernandez Santos ka konfirmuar se Real Madridi po e ndjek me kujdes zhvillimin e këtij portieri.
Paraqitjet e tij në Ligën Premier kanë tërhequr vëmendjen e klubit, dhe interesimi për të është rritur sidomos falë performancave me Brightonin dhe kombëtaren e Holandës.
Në moshën 24-vjeçare, Verbruggen tashmë është një nga lojtarët kyç të skuadrës angleze.
Pavarësisht moshës së re, ai ka fituar përvojë të vlefshme në nivel ndërkombëtar.
Një nga paraqitjet e tij më të spikatura ishte ajo kundër Manchester Cityt, ku arriti ta mbajë portën të paprekur, duke ndihmuar Brightonin të fitojë 1-0 në udhëtim.
Kontrata e Verbruggen me Brightonin është në fuqi deri në vitin 2028, një detaj që mund të bëjë transferimin e tij më të realizueshëm për Real Madridin.
Kjo periudhë përkon me përfundimin e pritshëm të kontratës së Courtois, nëse portieri belg vendos të nënshkruajë vazhdimin e saj deri në të njëjtin vit.
Megjithatë, Verbruggen nuk është i vetmi emër që po shqyrtohet nga drejtuesit e Real Madridit.
