Ushtruesja e detyrës së kryeprokurores në Prokurorinë Themelore të Pejës, Valbona Disha-Haxhosaj, ka emëruar prokurorin Ermal Demhasaj si koordinator për rastet e dhunës në familje.
Sipas njoftimit nga Prokuroria, Demhasaj do të ushtrojë këtë detyrë për një periudhë të pacaktuar.
Ky vendim ka ardhur në kuadër të organizimit të brendshëm dhe koordinimit të punës në këtë institucion, pas caktimit të Disha-Haxhosajt në pozitën e ushtrueses së detyrës së kryeprokurores nga Këshilli Prokurorial i Kosovës.
Të hënën, Disha-Haxhosaj zhvilloi një takim me të gjithë prokurorët e kësaj prokurorie, ku kërkoi që ata të rrisin përkushtimin dhe vigjilencën në ushtrimin e detyrave, veçanërisht gjatë kujdestarive.
Ajo theksoi rëndësinë e reagimit të shpejtë dhe trajtimit profesional të çdo rasti, duke u zotuar për mbështetje dhe bashkëpunim me prokurorët.
Disha-Haxhosaj gjithashtu u takua me stafin administrativ të Prokurorisë, nga i cili kërkoi angazhim më të madh, respektim të dispozitave ligjore dhe përmbushje profesionale të detyrave, me qëllim që të shmangen lëshimet eventuale dhe të rritet efikasiteti në punë.
Ajo theksoi se bashkëpunimi, përgjegjësia institucionale dhe koordinimi ndërmjet punonjësve janë thelbësore për përmbushjen e mandatit ligjor të Prokurorisë.
Burimi origjinal i informacionit: zeri .info
