Numri i kërkesave për azil në Bashkimin Evropian ka pësuar një rënie të dukshme.
Gjatë muajit korrik, 34.145 persona paraqitën për herë të parë kërkesë për mbrojtje ndërkombëtare, duke u shënuar një rënie prej rreth 39 për qind në krahasim me të njëjtën periudhë të vitit të kaluar, kur ishin regjistruar 55.680 kërkesa.
Sipas të dhënave të Eurostatit, rënia është evidentuar gjithashtu krahasuar me muajin qershor, kur numri i kërkesave kishte qenë tetë për qind më i lartë.
Megjithatë, dallimet mes shteteve anëtare të BE-së mbeten të mëdha.
Franca regjistroi numrin më të lartë të kërkesave për azil, me 9.000, e ndjekur nga Italia me 5.140, Greqia me 3.715, Spanja me 3.590 dhe Gjermania me 3.075.
Këto pesë vende pranuan së bashku rreth 72 për qind të të gjitha kërkesave të para për azil të regjistruara në BE gjatë korrikut.
Në raport me numrin e banorëve, Sllovenia u dallua dukshëm nga vendet e tjera, duke regjistruar 114,7 azilkërkues për çdo 100 mijë banorë, shumë më tepër se mesatarja e BE-së prej 7,6.
Pas Sllovenisë, Greqia renditet me 35,8 dhe Luksemburgu me 16,6 kërkesa për çdo 100 mijë banorë.
Sa u përket vendeve të origjinës, shtetasit e Afganistanit kryesuan listën me 3.100 kërkesa për azil.
Pas tyre renditen shtetasit e Sudanit me 2.605 kërkesa, Bangladeshit me 2.255 dhe Sirisë me 1.420.
Gjithashtu, gjatë korrikut u regjistruan edhe 1.290 kërkesa të para për azil nga të mitur të pashoqëruar nga prindërit ose kujdestarët e tyre.
Numri më i madh i këtyre kërkesave u regjistrua në Slloveni, me 265, e ndjekur nga Greqia me 245 dhe Holanda me 210.
Eurostati informoi se të dhënat e fundit përfshijnë ndryshime metodologjike të lidhura me zbatimin e Paktit të BE-së për Migracionin dhe Azilin, i cili pritet të zbatohet në qershor të vitit 2026.
