Reagimi i Ali Ahmetit për Protestat në Shqipëri: Thirrje për Maturim dhe Dialog

Kryetari i Bashkimit Demokratik për Integrim, Ali Ahmeti, ka shprehur shqetësimin e tij për situatën e krijuar në Shqipëri pas protestave të dhunshme.

Ai thekson se zhvillimet e fundit kërkojnë një vëmendje dhe përgjegjësi të jashtëzakonshme.

Sipas Ahmetit, politika shqiptare duhet të tregojë maturi dhe urtësi për të mbrojtur interesin e përbashkët. “ sot, më shumë se kurrë, është koha që të tejkalohen interesat e ngushta partiake dhe çdo konsideratë tjetër që mund të pengojë gjetjen e zgjidhjeve, në të mirë të Shqipërisë dhe qytetarëve të saj.

Në këtë moment, i bëj thirrje të gjithë klasës politike shqiptare, që të reflektojë urgjentisht.

Kjo është një çështje e interesit kombëtar, që kërkon përgjegjësi të përbashkët dhe vullnet për të tejkaluar veten, në të mirë të vendit.”, ka thënë ai.

Ai thekson se situata aktuale duhet të përballohet me maturi, përmes dialogut dhe veprimeve të përgjegjshme, për të ruajtur besimin te institucionet dhe për të siguruar një jetë të mirë për qytetarët. “Shqipëria nuk është pronë e askujt, por atdheu i të gjithëve.

Prandaj, kur Shqipëria përballet me vështirësi, të gjithë kemi përgjegjësi për të kontribuar në tejkalimin e tyre.

Shqipëria që digjet është Shqipëria e të gjithëve dhe humbja e saj është humbje për secilin prej nesh.”, ka thënë Ahmeti.

Ai gjithashtu iu ka bërë thirrje studentëve dhe protestuesve që të shprehin kërkesat e tyre me dinjitet dhe të shmangin tensionet që mund të dëmtojnë mesazhin e tyre. “Shkatërrimi nuk është zgjidhje, pas çdo biznesi qëndrojnë puna, mundi dhe sakrifica e njerëzve.

Forca e një proteste qëndron te qartësia e kërkesave, këmbëngulja qytetare dhe besnikëria ndaj parimeve demokratike.

Ndërkohë, institucionet e shtetit kanë një përgjegjësi të veçantë në ruajtjen e rendit, sigurisë dhe dinjitetit të qytetarëve.

Uniforma e policisë duhet të jetë simbol i ligjit, profesionalizmit dhe shërbimit ndaj qytetarëve, ndërsa institucionet duhet të veprojnë me paanshmëri, maturi dhe respekt të plotë për të drejtat themelore. Çdo situatë duhet të trajtohet me përgjegjësi, duke shmangur përshkallëzimin dhe duke garantuar respektimin e ligjit nga të gjithë.”, ka shtuar ai.

Ahmeti ka theksuar se asnjë formë dhune, nga cilado palë, nuk mund të jetë përgjigje ndaj krizës. “Përplasja nuk e zëvendëson dialogun, as shkatërrimi nuk e sjell ndryshimin e kërkuar.

Shqipëria, si një vend që synon anëtarësimin në Bashkimin Evropian, duhet të dëshmojë në praktikë respekt për demokracinë, sundimin e ligjit, institucionet dhe të drejtat e qytetarëve.

Sot më shumë se kurrë, duhet të dëshmojmë se mund të mos pajtohemi, pa u përçarë, dhe se dallimet politike janë pjesë e demokracisë, por ato nuk duhet të bëhen pengesë për interesin e përbashkët.”, ka përfunduar ai.

Burimi origjinal i informacionit: zeri .info