Presidentja e Kosovës, Vjosa Osmani, ka vendosur që zgjedhjet e jashtëzakonshme parlamentare të mbahen më 28 dhjetor. Pas konsultimeve me partitë politike, ajo tha se kjo është data e vetme e realizueshme përkundër sfidave që paraqet për Komisionin Qendror të Zgjedhjeve.
“Data 11 janar është përjashtuar si mundësi. Kanë mbetur dy opsione, 21 dhe 28 dhjetor. Partitë janë shprehur kryesisht për këto dy data: tetë parti kanë mbështetur 28 dhjetorin, pesë parti 21 dhjetorin, ndërsa tri subjekte politike kanë deklaruar se cilado datë është e pranueshme. Në fund kam vlerësuar se 28 dhjetori është data e vetme e mundshme, pavarësisht sfidave që mbeten për KQZ-në”, u shpreh Osmani.
Më herët gjatë ditës, presidentja zhvilloi një takim me kryetarët e partive për të diskutuar opsionet.
Nga njëra anë, PDK, AAK dhe NISMA kërkuan që zgjedhjet të mbahen më 21 dhjetor, ndërsa VV dhe partitë e afërta me të mbështetën 28 dhjetorin si datën më të përshtatshme.
