Sunny Hill Festival ka bërë një hap të ri strategjik në mbështetje të muzikës dhe talenteve të reja kosovare. Festivali ka nënshkruar një marrëveshje bashkëpunimi me European Talent Exchange (ETEP) – një platformë e njohur evropiane që ndihmon artistët e rinj të prezantohen në skena ndërkombëtare dhe t’u hapë dyert e rrjeteve profesionale të industrisë muzikore.
Ky partneritet përfaqëson një zhvillim të rëndësishëm për skenën muzikore në Kosovë, pasi u jep artistëve të rinj mundësi reale për të performuar në festivale dhe ngjarje të rëndësishme në mbarë Evropën.
Rezultatet e para të këtij bashkëpunimi tashmë janë konkretizuar: këngëtarja e re Bana Zahiti është ftuar të marrë pjesë në Eurosonic Noorderslag (ESNS) – një nga festivalet dhe konferencat më prestigjioze të kontinentit, e njohur për zbulimin e artistëve të rinj dhe prezantimin e tyre përpara profesionistëve dhe organizatorëve më të njohur të muzikës.
“Ky partneritet hap mundësi të reja për artistët tanë dhe për muzikën kosovare në përgjithësi,” ka deklaruar Shpat Begolli, drejtues i Sunny Hill Festival. “Si festival, jemi të përkushtuar të krijojmë ura bashkëpunimi që u mundësojnë artistëve tanë të talentuar të arrijnë audienca të reja dhe të fitojnë vëmendjen që meritojnë në skenën ndërkombëtare.”
Në kuadër të kësaj marrëveshjeje, Sunny Hill Festival pritet të zgjerojë rrjetin e partnerëve evropianë dhe të mirëpresë në Prishtinë artistë të rinj që janë pjesë e European Talent Exchange. Kjo iniciativë do të kontribuojë në ndërtimin e një skene më të gjallë, bashkëkohore dhe të ndërlidhur muzikore në Kosovë dhe rajon.
Me këtë hap, Sunny Hill Festival riafirmon misionin e tij për të promovuar kulturën, kreativitetin dhe potencialin artistik të Kosovës, duke e vendosur vendin në hartën e rëndësishme të muzikës evropiane dhe botërore.
