Forcat e Përbashkëta të NATO-s në Napoli kanë raportuar përfundimin e suksesshëm të stërvitjes ushtarake ‘NATO-Serbi 2026’, një aktivitet i përbashkët që u zhvillua në bashkëpunim ndërmjet Aleancës Veriatlantike dhe Serbisë.
Stërvitja u përfundua me një demonstrim final të kapaciteteve operacionale, pas dy javësh intensive trajnimesh dhe simulimesh të skenarëve të ruajtjes së paqes dhe reagimit ndaj krizave.
Në këtë stërvitje morën pjesë rreth 600 trupa nga disa vende, të cilat u stërvitën krah për krah në operacione ushtarake dhe humanitare.
NATO theksoi se stërvitja u zhvillua ‘me respekt të plotë ndaj politikës së neutralitetit ushtarak të Serbisë’.
Ndihmës-Sekretari i Përgjithshëm i NATO-s, Kevin Hamilton, tha se stërvitja përfaqëson një dëshmi të marrëdhënieve të zhvilluara mes NATO-s dhe Serbisë.
Ai shtoi se Aleanca Veriatlantike është e gatshme të thellojë bashkëpunimin me Beogradin, duke respektuar neutralitetin ushtarak të Serbisë.
