Në një moment prekës dhe plot dhimbje, Selvije Jao, bashkëshortja e këngëtarit të njohur Shpat Kasapi – ka folur publikisht për herë të parë pas ndarjes së tij të papritur nga jeta. Deklarata e saj, e mbushur me emocion, vjen si një dëshmi e dashurisë së madhe dhe respektit të thellë që ajo kishte për artistin.
Selvije shprehu trishtimin e saj të madh teksa foli për bashkëshortin dhe babain e djalit të tyre, duke theksuar virtytet dhe thjeshtësinë që e karakterizonin:
“Dhe sinqerisht më vjen keq që sot këtu të dal para jush të flas për ndërrimin e jetës së bashkëshortit tim, të një babai të mrekullueshëm, një artisti të mrekullueshëm me shumë virtyte, një artisti shumë modest.”
Ajo rrëfeu edhe lidhjen e fortë shpirtërore që kishte me Shpatin, lidhje që e kishte mbështetur dhe plotësuar në çdo hap të jetës:
“Një njeri që mua si Selvije më ka kompletuar, më ka mbështetur, më ka respektuar dhe më ka dashur, mbi të gjitha më ka falë një djalë si Drita.”
Në fjalët e saj prekëse, Selvije foli edhe për djalin e tyre, Roelin, vetëm 3 vjeç e gjysmë, i cili ende nuk e kupton humbjen e të atit:
“Ai ende nuk e kupton se nuk e ka babanë e tij dhe unë nuk e di si do të rritet me këtë dhe nuk e di se kush do ta tregojë. Por e di që ai është shumë krenar me babanë e tij, e ka dashur shumë Shpatin dhe ai është përkushtuar deri në frymën e fundit që Roeli të ketë gjithçka të mirat.”
Fjalët e Selvijes janë një homazh i ndjerë për jetën dhe kontributin e Shpat Kasapit jo vetëm si artist i dashur për publikun, por edhe si bashkëshort dhe baba i përkushtuar. Ato tregojnë dhimbjen e madhe që ka përfshirë familjen pas kësaj humbjeje të parakohshme, një dhimbje që do të mbetet gjatë në zemrat e tyre.
