Prej disa muajsh, mediat rozë kanë qenë të mbushura me lajme rreth një romance të mundshme midis Sara Hoxhës, blogeres dhe sipërmarrëses së njohur, dhe Erik Fullanit, djalit të ish-guvernatorit të Bankës së Shqipërisë, Ardian Fullani. Thashethemet nisën gjatë verës, kur u publikuan pamje të tyre së bashku në jug të vendit.
Megjithatë, si Sara ashtu edhe Eriku kanë zgjedhur të ruajnë privatësinë, duke mos e pranuar apo mohuar lidhjen e përfolur.
Së fundmi, një video e postuar nga vetë Sara Hoxha në Instagram ka ngjallur sërish reagime të shumta dhe duket se i ka dhënë fund çdo dyshimi. Në videon e publikuar, Sara shfaqet në shtëpi me vajzën e saj, Poin, teksa hapin qeset e ushqimit nga “Frit” – biznesi i saj i ri gastronomik. Por ajo që tërhoqi menjëherë vëmendjen ishte një detaj i vogël: në video shfaqen edhe duart e një personi tjetër që ndihmonte gjatë xhirimit.
Vëmendja e ndjekësve u përqendrua te ora e dorës që mbante ai person, e cila është identike me atë që Erik Fullani mban shpesh në postimet e tij në rrjetet sociale. Pak më vonë, Eriku publikoi edhe vetë një video në Instagram, ku shihej me të njëjtën orë dhe duke shijuar ushqim nga i njëjti brand – “Frit”.
Ky “detaj i vogël”, për publikun është konsideruar si konfirmimi i parë jozyrtar i lidhjes mes Sarës dhe Erikut. Pas pamjeve verore, ky duket të jetë hapi i radhës që tregon se çifti ka vendosur të mos e fshehë më afërsinë e tyre.
