Një film i madh ndërkombëtar që do të trajtojë luftën e Kosovës pritet të sjellë në ekran disa prej emrave më të njohur të Hollywood-it, mes tyre edhe legjendën Robert De Niro.
Lajmin emocionues e ka bërë publik producenti kosovar Fitim Krasniqi, i cili prej vitesh është aktiv në kinemanë ndërkombëtare. Në një intervistë për Blendi Fevziun, Krasniqi zbuloi se projekti do të bazohet në një histori tepër personale — jetën dhe fatin tragjik të babait të tij, të ndërlidhur me një nga ngjarjet më të dhimbshme të historisë shqiptare, masakrën e Reçakut.
“Është historia e babait tim, dhe masakrës së Reçakut, dhe luftës që ka ndodhur në Kosovë nga fillimi deri në fund”, tha Krasniqi me emocione.
Producenti tregoi se babai i tij, gjatë luftës, ishte plagosur dhe më pas djegur për së gjalli, një histori që tashmë do të shndërrohet në një film me një mesazh të fuqishëm njerëzor e emocional.
Krasniqi konfirmoi gjithashtu se Robert De Niro ka pranuar të portretizojë pikërisht roli i babait të tij, duke e quajtur këtë një nder të jashtëzakonshëm për familjen dhe për Kosovën.
“Në projekt do të marrin pjesë 71 aktorë nga Hollywood-i, përfshirë De Niron. Të gjitha kontratat janë nënshkruar”, – tha producenti.
Sipas tij, xhirimet do të nisin vitin e ardhshëm, pasi janë shtyrë për arsye organizative. Megjithatë, projekti tashmë është në fazat e fundit të përgatitjes dhe pritet të jetë një nga prodhimet më të rëndësishme që i kushtohen luftës së Kosovës në kinemanë botërore.
Ky film pritet të sjellë jo vetëm një histori personale prekëse, por edhe një kujtesë kolektive për sakrificat e popullit kosovar, përmes artit dhe fuqisë së ekranit të madh.
View this post on Instagram
