Këngëtari i njohur shqiptar, Robert Berisha, ishte ndër personazhet publikë që sot mori pjesë në procesin zgjedhor, duke ushtruar të drejtën e tij të votës.
I shoqëruar nga vajza e tij, Rene, artisti u shpreh për mediat se kishte dalë për të votuar në raundin e dytë të zgjedhjeve lokale, të cilat po zhvillohen në 18 komuna të Kosovës.
“Po, është hera e dytë që po vij për të votuar – shpresoj të mos ketë nevojë për një të tretë, të mos na vijë puna më”, u shpreh me humor këngëtari gjatë një deklarate për RTV Dukagjini.
Berisha theksoi gjithashtu se procesi i votimit kishte kaluar pa asnjë pengesë dhe mjaft shpejt, ndërsa bëri thirrje që edhe qytetarët e tjerë të ndjekin shembullin e tij.
“Është kulturë të votosh. Unë votoj edhe në Amerikë, edhe këtu. Edhe atje, nëse nuk voton, të kritikojnë. Kur shkon për të nxjerrë një dokument apo pasaportë, sistemi të tregon menjëherë nëse ke marrë pjesë në votime apo jo”, shtoi ai.
Në fund, Roberti komentoi edhe disa nga çështjet që e shqetësojnë si qytetar i kryeqytetit, duke përmendur trafikun në Prishtinë si një nga problemet kryesore, por duke u shprehur optimist për përmirësime në të ardhmen.
