Kryetari i Partisë Demokratike të Kosovës (PDK), Memli Krasniqi, pritet që sot të paraqesë dorëheqjen nga posti i tij në krye të partisë.
Burime të afërta me strukturat e PDK-së kanë bërë të ditur se Krasniqi do ta zyrtarizojë vendimin gjatë mbledhjes së sotme të Kryesisë, ku pritet të diskutohet edhe për hapat e ardhshëm të partisë pas rezultateve të dobëta në zgjedhjet lokale.
Sipas burimeve, dorëheqja e tij lidhet me mosarritjen e objektivave që PDK-ja kishte parashtruar për zgjedhjet e fundit komunale. Ky vendim, sipas po të njëjtave burime, pritet të hapë rrugën për mbajtjen e një konvente të re zgjedhore brenda partisë.
Pas mbledhjes, Memli Krasniqi pritet të dalë para mediave për të sqaruar publikisht arsyet e dorëheqjes dhe për të folur rreth procesit të tranzicionit në udhëheqjen e PDK-së.
Në zgjedhjet e fundit lokale, PDK-ja ka arritur të fitojë gjashtë komuna: Prizrenin, Ferizajn, Skenderajn, Vushtrrinë, Kaçanikun dhe Hanin e Elezit, ndërsa ka humbur bastione të rëndësishme si Drenasi dhe Mitrovica.
Kujtojmë se më 3 korrik të vitit 2021, Memli Krasniqi ishte zgjedhur kryetar i PDK-së me shumicë dërrmuese votash, duke marrë 469 vota nga delegatët e partisë, ndërsa vetëm 7 vota ishin kundër.
