Këngëtari Mentor Haziri është larguar papritur nga shtëpia e “Big Brother Vip Kosova”, vetëm pak më shumë se 24 orë pas hyrjes së tij. Largimi i tij preku publikun dhe banorët, teksa arsyeja ishte tejet e dhimbshme dhe personale.
Haziri njoftoi se pak para se të bëhej pjesë e edicionit, kishte humbur një familjar të afërt – djalin e dajës. Ai tregoi se funeralin e kishte kryer një ditë përpara se të hynte në shtëpi, duke shpresuar se do të arrinte ta përballonte emocionalisht qëndrimin brenda formatit.
Por pavarësisht vullnetit, ngarkesa emocionale e situatës bëri që ai të mos mund të vazhdonte garën.
“Siç e dini, kam humbur djalin e dajës, dhe e kam varrosur një ditë para se të vija këtu. Kam mendu që do ta kaloj, e kam mbajt fjalën dhe besën, kam ardh sepse kështu meriton një produksion i tillë. Mendova që do t’ia dal, por nuk munda”, tha Haziri teksa mblodhi banorët për t’ua komunikuar vendimin.
Banorët e përshëndetën me respekt dhe i shprehën ngushëllimet për humbjen e rëndë.
Largimi i tij la një boshllëk të menjëhershëm në shtëpi, por publiku dhe ndjekësit e kanë mbështetur gjerësisht për vendimin e tij njerëzor.
