Pas fitores së Lëvizjes Vetëvendosje në Fushë Kosovë, kryeministri i Kosovës, Albin Kurti, ka vizituar komunën ku u prit me entuziazëm nga qytetarët dhe përfaqësuesit lokalë të partisë.
Në një video të publikuar nga terreni, Kurti është shprehur i bindur se fitorja e Valon Prebrezës është një hap i rëndësishëm për vazhdimin e punës së Vetëvendosjes në nivel lokal dhe për përforcimin e qeverisjes progresive në vend.
“Vetëvendosja dhe Valon Prebreza e vazhdojnë këtë rrugëtim, kësaj radhe edhe më mirë, edhe më lehtë, sepse këtë betejë do ta vazhdojmë edhe nga zyra e kryetarit të komunës, ku do të hyjë së shpejti Valon Prebreza,” – deklaroi Kurti.
Ai shtoi se Prebreza do ta ketë një mbështetje të plotë nga niveli qendror:
“Valon Prebreza do ta ketë mbështetjen e fuqishme, pa rezervë, pa kursim dhe pa pushim, të qeverisë së Republikës së Kosovës dhe timen si kryeministër.”
Kryeministri Kurti theksoi se fitorja në Fushë Kosovë është rezultat i një pune të gjatë dhe i besimit që qytetarët kanë në programin e Vetëvendosjes, duke e konsideruar këtë si një dëshmi të rritjes së qëndrueshme të lëvizjes në mbarë vendin.
Vizita e Kurtit shënoi një moment simbolik për Vetëvendosjen, që synon ta shndërrojë fitoren në Fushë Kosovë në një model të qeverisjes lokale të bazuar në transparencë, zhvillim dhe bashkëpunim me qytetarët.
