Skena e Festivalit të Këngës në RTK këtë vit njohu një yll të ri. Këngëtarja e talentuar nga Tirana, Arsi Bako, u shpall fituesja e madhe e edicionit të tretë të këtij festivali muzikor, që u mbajt mbrëmë në Prishtinë.
Me një performancë të fuqishme dhe plot emocion, Bako arriti të fitojë zemrat e jurisë dhe publikut me këngën e saj “Rreze zjarr” – një krijim energjik me frymë roku, që e bëri të spikaste mes 10 finalistëve. Ajo u kurorëzua me çmimin kryesor të mbrëmjes, trofeun “Diamanti i Kaltër”.
Kush është Arsi Bako?
Edhe pse për publikun kosovar emri i saj mund të jetë i ri, Arsi Bako ka ndërtuar prej vitesh një karrierë të qëndrueshme në muzikën shqiptare. Me origjinë nga Tirana, ajo nisi rrugëtimin e saj artistik që në moshën 15-vjeçare.
Ajo u bë e njohur pas pjesëmarrjes në festivalin e gjimnazeve “Art Fest”, ku fitoi çmimin “Zëri më i mirë” në daljen e saj të parë, ndërsa një vit më pas u vlerësua me Çmimin e Parë.
Bako është një kantautore e plotë — ajo shkruan tekstet dhe kompozon vetë shumë prej këngëve të saj. Përveç talentit në muzikë, ajo luan piano dhe kitarë, si dhe ka pasion pikturën.
Para fitores së saj në RTK, Arsi ka qenë pjesë e disa festivaleve të njohura në Shqipëri, përfshirë:
-
Festivalin e Këngës në RTSH (dhjetor 2023) me këngën “Zgjohu”
-
Kënga Magjike (2022 me “Më Mbaj” dhe 2024 me “Dua… Dua… Dua…”)
E emocionuar pas marrjes së çmimit të madh, Arsi tha për mediat:
“Nuk e kam pritur. Ndihem shumë e lumtur. Shumë faleminderit!”
Një natë plot muzikë e surpriza
Finalja e Festivalit të Këngës në RTK solli një konkurrencë të fortë mes artistëve pjesëmarrës.
Në vendin e dytë u rendit Florent Abrashi me këngën “Unë dhe Ti”, ndërsa vendi i tretë i takoi Arjeta Palushaj me baladën “Andrra”.
Përveç çmimit kryesor, Arsi Bako u nderua edhe me Çmimin e Kryeqytetit, si një nga artistet që la më shumë përshtypje këtë edicion.
Mbrëmja u pasurua me performanca të yjeve të njohur të muzikës shqiptare si Gjon’s Tears, Elvana Gjata, Dren Abazi dhe Tuna, duke e kthyer Prishtinën në qendrën e spektaklit muzikor për një natë të paharrueshme.
