Thashethemet rreth Labinot Rexhës, banorit të Big Brother VIP Kosova 4, kanë marrë sërish vëmendje pasi në rrjetet sociale është publikuar një foto e re ku ai shihet bashkë me një grua serbe dhe një foshnjë. Këto zëra nisën disa ditë më parë, kur qarkulluan imazhe të ngjashme nën përshkrimin: “Gjaku nuk bëhet ujë”, duke hapur diskutime për një fëmijë të mundshëm jashtëmartesor.
Bashkëshortja e Labinotit, Laureta Hoxha, reagoi menjëherë përmes një interviste për Kosova Today, duke mohuar kategorikisht që fëmija të kishte lidhje me Labinotin. Ajo sqaroi se gruaja në fjalë kishte kërkuar vetëm ndihmë për të gjetur babain e vërtetë të foshnjës, i cili sipas saj mban po të njëjtin mbiemër, Rexha.
“Ajo ka kërkuar ndihmë nga Labinoti për ta gjetur prindin biologjik të fëmijës së vet… Ky fëmijë nuk ka të bëjë asgjë me Labinotin,” u shpreh Laureta, duke hedhur poshtë çdo aludim për lidhje tjetër mes tyre.
Por situata mori një kthesë të re. Profili i nënës së foshnjës publikoi një imazh të ri ku Labinoti shihet duke puthur foshnjën, shoqëruar me përshkrimin: “Vetëm familje. Ju faleminderit.”
Ky postim ka rikthyer dyshimet dhe konfuzionin, duke bërë që publiku të vërë në pikëpyetje versionin e Lauretës. Ndërkohë mbetet e paqartë nëse fjala “familje” përdoret në kuptimin metaforik si shenjë falënderimi, apo nëse nënkupton një marrëdhënie më të afërt sesa ajo që është deklaruar publikisht.
Reagimet në rrjetet sociale janë të shumta, dhe ndjekësit presin me interes zhvillimet e ardhshme për të kuptuar nëse kjo foto e re ndryshon narrativën, apo nëse ende ekzistojnë detaje që nuk janë bërë publike.
