Mbrëmja e fundit e Big Brother VIP Kosova u shoqërua me debate të forta jo vetëm brenda studios, por edhe jashtë saj, duke u zhvendosur menjëherë në rrjetet sociale. Një nga reagimet që tërhoqi më së shumti vëmendjen ishte ai i ish-banores së BBVK 3, Gresa Gashi.
Përmes një postimi në Instagram, Gresa reagoi ashpër ndaj opinionistes së këtij edicioni, Olta Gixhari, duke publikuar një deklaratë të drejtpërdrejtë dhe provokuese. Ajo shkroi:
“O.G, me pas fuqi ta kisha ndalu me hi në Kosovë”.
Edhe pse nuk e përmendi emrin e plotë, inicialet e përdorura u interpretuan gjerësisht si një referencë e qartë ndaj Olta Gixharit, duke ndezur menjëherë diskutime të shumta mes ndjekësve të formatit.
Reagimi i Gresës erdhi në kohë reale gjatë transmetimit të Prime-it, në momentin kur në studio po diskutohej rrëfimi emocional i banores Sasa, histori e cila preku ndjeshëm publikun. Duket se qasja apo komentet e opinionistes lidhur me këtë rrëfim nuk janë pritur mirë nga ish-banorja, e cila vendosi të shprehë hapur pakënaqësinë e saj në rrjete sociale.
Postimi u përhap me shpejtësi dhe u bë viral, duke nxitur reagime të shumta pro dhe kundër deklaratës së Gresës. Deri tani, Olta Gixhari nuk ka dhënë asnjë reagim publik, ndërsa mbetet për t’u parë nëse kjo përplasje do të marrë një përgjigje në ditët në vijim.
