Gimbo, DJ i njohur dhe një nga miqtë më të afërt të fituesit të Big Brother VIP, Gjestit, ka dhënë një intervistë emocionale për Shpend Lipën, ku ka rrëfyer rrugëtimin e tij profesional dhe momentet e vështira që ka kaluar së bashku me mikun e tij.
Në bisedën e sinqertë, ai tregoi se Gjesti ka qenë gjithmonë motivimi i tij më i madh dhe forca që e ka shtyrë të mos dorëzohet në rrugën drejt suksesit. “Gjesti ka qenë shtysa kryesore, gjithmonë kam besu që bashkë do t’i kapnim majat,” u shpreh ai me emocion.
I pyetur nëse mund ta shohim ndonjëherë si pjesëmarrës në Big Brother, Gimbo u përgjigj me humor: “Nuk është fer me fitu dy herë”, duke iu referuar fitores së mikut të tij të ngushtë.
Megjithatë, momenti më i ndjerë i intervistës ishte ai kur foli për periudhën e rëndë që kaluan pas ndarjes tragjike nga jeta të Eldionit, vëllait të Gjestit. Gimbo e përshkroi këtë si një përvojë shokuese dhe të dhimbshme:
“Për mu u kanë një bam. Ishalla Zoti e mëshiron ata dhe ngushëllime për familjen. Faleminderit krejt njerëzve që kanë qenë pjesëmarrës. Ua kthefshim në gëzim,” tha ai me lot në sy.
Ai shtoi se, pavarësisht dhimbjes, Gjesti po përpiqet ta përballojë situatën me forcë dhe mbështetje nga familja. “Momentalisht nuk është keq. Mirë është. Po rri me familjen ma shumë, kaq,” përfundoi ai me qetësi.
Kjo është hera e parë që një person kaq i afërt me Gjestin flet publikisht për gjendjen e tij pas tragjedisë që ndodhi më 26 shtator, kur vëllai i tij humbi jetën. Që nga ajo ditë, Gjesti ka qëndruar i tërhequr nga jeta publike dhe nuk ka bërë asnjë deklaratë, duke zgjedhur qetësinë dhe privatësinë për ta përballuar humbjen.
