Reperi i njohur Getinjo ka bërë një reagim të fortë në rrjetet sociale, duke ngritur shqetësimin për drejtimin që ka marrë muzika shqiptare. Në një Instagram Story, ai ndau një mesazh të thellë dhe kritik për gjendjen aktuale të industrisë, duke theksuar se mungon cilësia dhe thelbi i artit.
Getinjo e përshkroi skenën muzikore si një “tokë që nuk nxjerr as fruta e as lule”, një metaforë që nënkupton mungesën e vlerave dhe autenticitetit në krijimet moderne.
“Kjo është një periudhë shumë e vështirë për tekstshkruesit. Populli ka nevojë më shumë se kurrë për dije dhe tekste që kanë kuptim,” – u shpreh ai, duke nënvizuar rëndësinë e përmbajtjes në muzikë.
Edhe pse pranoi se vazhdon të fitojë të ardhura nga performancat nëpër klube, reperi paralajmëroi një ndryshim në qasjen e tij artistike, duke premtuar se në projektet e ardhshme do të fokusohet tek tekstet “të mençura dhe reale”.
“Do të publikoj këngë me mesazhe të forta dhe të vërteta. Audienca jonë ka nevojë për përmbajtje, jo vetëm për ritëm,” – tha Getinjo, duke paralajmëruar një fazë të re në karrierën e tij.
Reagimi i tij erdhi pak pasi ndau disa këngë të papublikuara, që morën komente të shumta nga ndjekësit. Ai tha se shpeshherë më shumë e prekin fjalët që i vijnë nga njerëz që nuk i njeh fare, sesa ato nga të afërmit, duke e cilësuar publikun e gjerë si gjykatësin më të sinqertë të artit.
Në fund të mesazhit, Getinjo u kujdes të theksonte se nuk ka asgjë personale me artistët e tjerë, duke shtuar se “ka vend për të gjithë” dhe se arti duhet të mbetet i lirë dhe i sinqertë.
“Nuk kam asgjë kundër askujt. Secili e ka mënyrën e vet. Ka vend për të gjithë,” – përfundoi ai.
Ky reagim i Getinjos ka bërë bujë në rrjete, me shumë fansa që e kanë përgëzuar për sinqeritetin dhe përpjekjen për të rikthyer kuptimin dhe mesazhin në muzikën shqiptare.
