Mbrëmja e sotme pritet të sjellë shumë emocione dhe skena të forta në Klan Kosova, pasi nga ora 21:00 nis premiera e sezonit të katërt të “Big Brother VIP Kosova”, reality-show-it më të ndjekur në vend. Edhe pse ka kaluar më pak se një javë nga hyrja e banorëve në shtëpi, “Vëllai i Madh” ka paralajmëruar një surprizë të madhe – një twist i veçantë që pritet të përfshijë njërin prej tyre dhe që, sipas gazetares së Klan Kosovës, Gresa Nitaj, do të hapë shumë diskutime.
Në prime do të rikthehet në fokus edhe largimi i papritur i këngëtarit Mentor Haziri. Ai qëndroi vetëm një natë brenda shtëpisë, por vendimi i tij për t’u larguar vullnetarisht ka hapur debat të madh si mes publikut, ashtu edhe brenda studios.
Një tjetër moment i nxehtë që pritet të marrë vëmendje është përplasja e fortë mes Benitës, Albes dhe Elijonës. Debati mes tyre eskaloi në akuza personale, duke bërë që Elijona të përjetojë një moment të rënduar emocionalisht, gjë që ka ngjallur reagime të shumta online.
E gjithë dinamika e mbrëmjes pritet të sjellë tension, emocione dhe momente të papritura, ndaj publiku është i ftuar të ndjekë gjithçka drejtpërdrejt nga ora 21:00 në Klan Kosova.
