Aktori dhe producenti i njohur shqiptar, Ermal Mamaqi, ka sqaruar së fundmi deklaratat që krijuan debat publik pas intervistës së tij në Top Albania Radio, ku foli për konceptin e varfërisë dhe mënyrën si njerëzit e përcaktojnë jetën e tyre përmes zgjedhjeve personale.
Në një paraqitje në emisionin “Goca dhe Gra”, Mamaqi theksoi se fjalët e tij janë keqinterpretuar, duke sqaruar se nuk e kishte për qëllim të ofendonte askënd, por të nxisë reflektim mbi mënyrën si secili ndërton jetën e vet.
“Kush punon 12 orë nuk është i varfër. Unë i referohesha disa formave të ndryshme të dembelizmit. Nëse je dembel në moshën 40-vjeçare, atëherë e meriton statusin që ke. Për mua, varfëria më e madhe nuk është ajo financiare. I varfër quhesh kur nuk mbyll dot shpenzimet minimale,” – u shpreh ai.
Mamaqi sqaroi më tej se fjala “e meriton” duhet kuptuar në dy mënyra: jo në aspektin njerëzor, por në atë praktik e jetësor, ku rezultatet janë pasojë e vendimeve që njeriu merr vetë.
“Askush nuk e meriton të jetë i varfër nga pikëpamja njerëzore. Por nëse ke zgjedhur të mos bësh asgjë, atëherë jeton pasojën e zgjedhjeve të tua. Ne marrim atë që kemi programuar dhe planifikuar,” shtoi ai.
Aktori gjithashtu paralajmëroi për ndryshimet që po sjell teknologjia dhe rrezikun që njerëzit dembelë mund të zëvendësohen nga robotët në të ardhmen e afërt.
“Çohu dhe bëj diçka, sepse shumë shpejt robotët do vijnë dhe do na zënë vendin. Nëse ndien që diçka nuk shkon në jetën tënde, duhet të ndryshosh diçka. Kjo është mënyra e vetme për të ecur përpara,” tha Mamaqi.
Në fund, ai solli edhe një reflektim mbi konceptin e “0 based thinking”, një filozofi që ai e praktikon shpesh në jetën personale e profesionale:
“0 based thinking, pra të menduarit nga zero. Pyetja është: Duke ditur atë që di sot, a do ta bëja përsëri këtë gjë që po bëj?”
Deklaratat e Mamaqit kanë hapur diskutim të gjerë në publik, mes atyre që e mbështesin për mënyrën e drejtpërdrejtë të të menduarit dhe atyre që e kritikojnë për tonin e tij provokues.
