Erëza Suka po vazhdon të bëhet një prej emrave më të përfolur në skenën e talentëve evropianë, teksa sot pritet të prekë gjysmëfinalen e spektaklit gjigant “The Voice of Germany”.
Vajza e ish-futbollistit të njohur të Ballkanit dhe Shkëndijës së Tetovës, Bekim Suka, po shkëlqen me një kombinim të fuqishëm zëri, prezencë skenike dhe origjinaliteti artistik. Edhe pse e lindur dhe e rritur në Perëndim, Erëza rrënjët i ka nga Suhareka, dhe këtë identitet e ka reflektuar me krenari në çdo paraqitje publike.
Gjatë fazave të para të garës, ajo ka arritur të spikasë mes shumë konkurrentëve, duke marrë vlerësime të larta nga anëtarët e jurisë dhe mbështetje të madhe nga publiku gjerman. Performancat e saj kanë qenë ndër më të klikuarat në platformën online të spektaklit, teksa komentet pozitive nuk kanë munguar.
Sonte, Erëza pritet të ngjitet sërish në skenë, ku e pret një sfidë vendimtare. Me këtë performancë ajo ka mundësinë të sigurojë një vend në gjysmëfinalen e “The Voice of Germany”, duke e çuar edhe më tej suksesin dhe krenarinë shqiptare në arenën ndërkombëtare.
