Një seri zhvillimesh që lidhen me biznesmenin Astrit Çitaku dhe kryetarin e komunës së Skenderajt Sami Lushtaku ka ngritur pikëpyetje për lidhje të mundshme interesi dhe përfitime financiare.
Sipas të dhënave të publikuara në media, Çitaku e ka regjistruar biznesin e tij më 19 korrik 2023. Vetëm shtatë ditë më vonë, më 26 korrik 2023, kompania e tij përfitoi pronë komunale me vlerë rreth 2.5 milionë euro. Obligimi që kompania ka ndaj komunës lidhet me pagesën e 30% të taksës për linjat e operimit.
Çitaku u emërua së fundmi këshilltar i jashtëm nga Lushtaku, vendim që ka ngjallur reagime dhe kritika në opinion. Sipas raportimeve, këshilltari i ri përballet edhe me aktakuzë aktive për shkatërrim të pronës publike, si dhe përmendet si përfitues i bonuseve të zonimit jashtëligjshëm.
Po ashtu, ai raportohet të jetë ortak në biznes me Mërgim Lushtaku, djalin e kryetarit të komunës. Në raportimet mediatike përmendet edhe një transaksion bankar prej 140 mijë eurosh mes Mërgim Lushtakut dhe një biznesmeni që është aksionar në projektin për marrjen e tokës komunale.
Kritikët e këtij vendimi thonë se emërimi i Çitakut në pozitën e këshilltarit mund të interpretohet si një mënyrë për të mbikëqyrur ose mirëmbajtur interesa biznesore private, ndërsa ata kërkojnë transparencë të plotë për procesin e dhënies së pronës komunale dhe lidhjet biznesore të përfshira.
Deri tani nuk ka pasur reagim zyrtar nga komuna lidhur me këto pretendime.
