Moderatorja e njohur Bora Zemani ka folur hapur për marrëdhënien e saj me formatin “Big Brother”. E ftuar në emisionin “Goca dhe Gra”, ajo u pyet nëse do të pranonte ndonjëherë të ishte pjesë e shtëpisë më të famshme në vend, por përgjigjja e saj ishte e prerë: jo.
Bora pranoi se eksperienca e “Big Brother”-it i duket jashtëzakonisht e vështirë dhe se personalisht nuk do të mund ta përballonte. Ajo shpjegoi se, edhe pse fizikisht nuk ka qenë brenda shtëpisë, emocionet e forta të spektaklit i ka ndjekur nga afër gjatë kohës kur Donald Veshaj ishte banor.
“Nuk besoj sepse më duket eksperiencë shumë e vështirë. Unë nuk do e bëja dot. Në këto kushte që kam qenë, i kam parë benefitet pa qenë pjesë e shtëpisë. BBV1 ka qenë eksperiencë shumë intensive, madje mbytëse, sepse kishte të bënte me gjëra të miat personale”, u shpreh moderatorja.
Zemani nënvizoi se presioni emocional i formatit është i madh dhe se përjetimet personale që i ka sjellë sezoni i parë e kanë bindur se nuk do të ishte kurrë një vendim i duhur për të.
Deklarata e saj erdhi si përgjigje ndaj kuriozitetit të publikut, pasi emri i Borës shpesh përmendet nga ndjekësit sa herë flitet për emra të mundshëm që mund t’i bashkohen shtëpisë së Big Brother VIP.
