Banorja e eliminuar në gjysmëfinale, Benita Zena, është ngjitur sonte në skenën e finales së Big Brother VIP Kosova 4 në Klan Arena, duke surprizuar publikun me performancën e këngës së saj ‘Bugatti’.
Kënga në fjalë ishte bërë një prej momenteve më të komentuara gjatë qëndrimit të saj në shtëpinë më të famshme në vend. ‘Bugatti’ u kthye në meme në rrjetet sociale, me fragmente që qarkulluan gjerësisht dhe u përdorën në forma humoristike nga fansat e spektaklit.
Megjithatë, sonte në finale, Benita solli një version krejt tjetër të këngës.
Ajo u shfaq me një performancë të kuruar, me prezencë skenike më të fortë dhe interpretim më të strukturuar, duke e kthyer momentin që dikur ishte trajtuar me humor në një paraqitje serioze përpara publikut të madh në Klan Arena.
Rikthimi i saj në skenë u prit me duartrokitje, ndërsa rrjetet sociale reaguan menjëherë, këtë herë duke komentuar transformimin e saj dhe mënyrën si e përqafoi një moment që dikur ishte bërë viral për arsye krejt të tjera.
