Kryetari i Lëvizjes Vetëvendosje, Albin Kurti, ka deklaruar se konstituimi i Kuvendit pa një marrëveshje paraprake për zgjedhjen e presidentit do të krijonte rrezik për shpërndarjen e legjislativit.
Në një konferencë për media, Kurti tha se vazhdimi i dialogut politik është rruga e vetme për formimin e institucioneve në përputhje me rendin kushtetues dhe vullnetin e qytetarëve të shprehur në zgjedhjet e 7 qershorit. “Çfarëdo konstituimi i Kuvendit pa marrëveshje për presidentin do të ishte parapërgatitje për shpërndarjen e Kuvendit.
Në këtë mënyrë, dhënia e mundësisë për dialog politik është e vetmja mënyrë dhe zgjidhja e duhur për formimin e institucioneve tona, ashtu siç e do rendi dhe siç kanë votuar qytetarët në zgjedhjet e 7 qershorit”, tha Kurti.
Ai shtoi se, përballë situatës aktuale, është e nevojshme t’u jepet mundësi diskutimeve politike përpara se të procedohet me konstituimin e Kuvendit. “Përballë kësaj situate, e cila ka përvojë e trashëgimi, është e nevojshme t’i jepet shans vazhdimit të diskutimeve para se të lëvizim me konstituimin e Kuvendit”, u shpreh ai.
Sipas Kurtit, vetëm pasi të arrihet një dakordim për zgjedhjen e presidentit duhet të vazhdohet me hapat e tjerë institucionalë. “Vetëm atëherë kur ta kemi arritur dakordimin për çështjen e presidentit, të procedojmë me çështjet tjera. Është e nevojshme që t’u kthehemi diskutimeve për ta zgjedhur presidentin dhe, kur ta kemi një marrëveshje, ta thërrasim seancën për konstituimin e Kuvendit”, deklaroi Kurti.
Burimi origjinal i informacionit: zeri .info
