Kryeministri në detyrë dhe kreu i Lëvizjes Vetëvendosje, Albin Kurti, i ka dërguar një letër kryetarit të PDK-së, Bedri Hamza, duke i përsëritur ftesën për takim dhe ofertën për rokadë mes pozitës së kryetarit dhe nënkryetarit të Kuvendit, në këmbim të pjesëmarrjes së PDK-së në votimin për presidentin e ri.
Në letrën e datës 7 gusht, Kurti ka thënë se nuk e kupton pse të mos takohet me Hamzën dhe të diskutojnë për çështjet që lidhen me institucionet dhe interesin e qytetarëve.
Ai ka thënë se e respekton pozicionin e PDK-së për të mbetur në opozitë, por ka theksuar se konstituimi i Kuvendit dhe zgjedhja e presidentit të ri duhet të bëhen bashkë.
Kurti më pas i ka përsëritur Hamzës ofertën për rokadë mes pozitës së nënkryetarit të Kuvendit që i takon PDK-së dhe pozitës së kryetarit të Kuvendit.
Hamza sot, në përgjigjen drejtuar Kurtit, ka ritheksuar se PDK-ja do të qëndrojë në opozitë.
Burimi origjinal i informacionit: zeri .info
