Rita Ora, këngëtarja shqiptare me famë botërore, ka prekur zemrat e ndjekësve sot me një dedikim të veçantë familjar. Në Ditën e Flamurit, ajo ka zgjedhur të ndajë një urim të ndjerë për ditëlindjen e gjyshes së saj, Besës,një figurë shumë të dashur në jetën e artistes.
Në InstaStory, Rita publikoi një fotografi të gjyshes, të shoqëruar me një mbishkrim të thjeshtë, por plot emocion: “Urime ditëlindjen nanë”, shkruar në gjuhën shqipe.
Besa, gjyshja nga ana e babait, është bashkëshortja e të ndjerit Besim Sahatçiu, regjisorit të njohur shqiptar dhe një prej ikonave të skenës teatrore e kinematografike në Ballkan. Përmes këtij urimi, Rita jo vetëm që nderoi ditëlindjen e gjyshes, por i kujtoi publikut rrënjët e forta artistike të familjes së saj.
Përveç fotos së gjyshes, Rita publikoi edhe një fotografi të babait të saj, Besnikut, duke e shoqëruar me një urim të përzemërt për të gjithë shqiptarët në këtë 28 Nëntor – një ditë e shënuar për kombin dhe diasporën.
Ky gjest i vogël, por me domethënie të madhe, e rikonfirmon edhe një herë lidhjen e ngrohtë të Ritës me origjinën e saj. Pavarësisht suksesit global, këngëtarja vazhdon të tregojë publikisht krenarinë për kulturën dhe trashëgiminë shqiptare.
Rita Ora mbetet një ndër figurat më të dashura të publikut, jo vetëm për arritjet ndërkombëtare, por edhe për mënyrën e sinqertë se si e mban pranë familjen, traditën dhe identitetin shqiptar edhe në momentet e saj më të zëna artistike.
