Agjencia e Ushqimit dhe Veterinarisë (AUV) ka vendosur të ndalojë prodhimin dhe shpërndarjen e suxhukut nga kompania BUQUKU SH.P.K. në Pejë.
Kjo masë është marrë pasi në produktin “Suxhuk shtëpiak” është gjetur ADN e pulës, ndërkohë që në deklaratën e produktit figurojnë vetëm mishi dhe yndyra e lopës.
Sipas njoftimit të AUV-së, mostra e suxhukut është marrë nga inspektorët dhe është analizuar në laboratorin ALIMENTI-OMNILAB në Bullgari.
Rezultatet e analizës kanë konfirmuar praninë e ADN-së së gjedhit dhe të pulës.
AUV ka sqaruar se analiza konfirmon praninë e ADN-së së pulës, por nuk është përcaktuar lloji, sasia apo burimi i materialit të përdorur.
Prandaj, verifikimet do të vazhdojnë për të parë nëse është përdorur mish pule i ndarë mekanikisht apo përbërës të tjerë me origjinë nga pula.
Pas marrjes së rezultateve laboratorike, inspektorët kanë realizuar një kontroll zyrtar në kompaninë BUQUKU SH.P.K., ku janë bllokuar gjithsej 178 kilogramë produkte.
Nga këto, 120 kilogramë janë suxhuk “Kalorik” dhe 58 kilogramë suxhuk shtëpiak.
AUV ka urdhëruar gjithashtu ndalimin e prodhimit të suxhukut dhe tërheqjen e produkteve nga pikat e shpërndarjes.
Agjencia ka njoftuar se do të zgjerojë kontrollet për të verifikuar përbërjen e të gjitha produkteve të mishit të këtij operatori, për prejardhjen dhe gjurmueshmërinë e lëndëve të para, procesin e prodhimit, kushtet e ruajtjes dhe përputhshmërinë e produkteve me deklaratat.
Në kuadër të këtyre kontrolleve, do të shqyrtohen edhe dokumentacioni i furnizimit, regjistrat e prodhimit dhe kushtet e fermentimit, tharjes dhe trajtimit termik, si dhe do të realizohen analiza të tjera laboratorike.
Megjithatë, AUV ka theksuar se gjetja laboratorike i referohet vetëm produktit “Suxhuk shtëpiak” të testuar dhe nuk nënkupton se e njëjta mospërputhje është konstatuar edhe në produktet e tjera të kompanisë.
Sipas Agjencisë, operatorët ekonomikë janë përgjegjës për deklarimin e saktë të përbërjes, gjurmueshmërinë dhe respektimin e standardeve për sigurinë ushqimore.
AUV ka njoftuar se do të ndërmarrë masat administrative dhe inspektuese të nevojshme, në përputhje me legjislacionin në fuqi, dhe ka ritheksuar se konsumatorët kanë të drejtë të informohen saktë për përbërjen dhe sigurinë e produkteve që blejnë.
Burimi origjinal i informacionit: zeri .info
