Të jesh grua në Afganistan është një mallkim, sepse regjimi i talibanëve nuk i trajton gratë si njerëz.
Ky regjim e keqpërdor brutalisht fenë islame për të shtypur gratë dhe për t’ua bërë jetën ferr.
Lajmi më i fundit nga kjo perandori e territ është se mjekëve afganë u ndalohet të trajtojnë gratë.
Kështu raporton një gazetë britanike.
Edhe pse nuk ka ndonjë njoftim zyrtar që ndalon mjekët të trajtojnë gratë, raportimet dhe intervistat me gra e mjekë tregojnë se një ndalim i tillë duket se po zbatohet në të gjithë vendin.
Sipas këtyre burimeve, mjekët në disa zona kanë marrë urdhra nga talibanët për të mos trajtuar paciente.
Ata e kanë konfirmuar se nuk u lejohet t’i ekzaminojnë pacientet apo t’u ofrojnë kujdes mjekësor urgjent, përveç në kushte të caktuara, siç është pranimi i kujdestarit të pacientes, të njohur si «mahram», ose nëse disa ndërhyrje kryhen nga infermieret.
Që nga dhjetori 2024, grave u është ndaluar të studiojnë mjekësi në universitete dhe gjithashtu, mjekëve në spitale u ndalohet të punësojnë gra.
Dentistët kanë raportuar se forcat e sigurisë të talibanëve zbatojnë këtë urdhër përmes bastisjeve dhe paralajmërimeve që do të burgosen nëse në ordinancat e tyre gjenden paciente.
Situata është veçanërisht absurde në provincën Balkh, në veri të Afganistanit: mjekëve atje u ndalohet t’u drejtohen pacienteve me emrat e tyre të vërtetë.
Zyrtarët kanë urdhëruar spitalet dhe klinikat që, në vend të emrave të grave, të përdorin fjalën «Bibi», një formë respekti për gratë e moshuara.
Edhe në recetat mjekësore, emri i gruas nuk shënohet, por përdoret vetëm «Bibi».
