Autoritetet zvicerane kanë zbuluar një lidhje të mundshme ndërmjet djathërave të tërhequr së fundmi nga tregu për shkak të kontaminimit me bakterin Listeria dhe rasteve të infektimit.
Sipas Zyrës Federale të Shëndetit Publik, nga fundi i gushtit deri në fund të tetorit janë regjistruar 14 raste të listeriozës, ndërsa një person ka humbur jetën.
Dy kompani zvicerane, Eberle Spezialitäten dhe Strähl Käse, u detyruan të tërhiqnin disa produkte djathi nga tregu, pasi gjatë kontrolleve u zbulua prania e bakterit Listeria monocytogenes.
Eberle Spezialitäten, me seli në Gossau të kantonit St.
Gallen, tërhoqi disa mini-ëmbëlsira të mbushura me djathë, të cilat ishin shitur në të gjithë Zvicrën, përfshirë edhe në supermarketet Coop dhe Migros.
Produktet gjysmë të gatshme të përdorura nga kompania vinin nga qumështorja Strähl, e cila gjithashtu u detyrua të tërhiqte disa lloje djathërash pas kontrolleve të mëtejshme.
Duke marrë parasysh se disa nga produktet kishin arritur edhe në Gjermani dhe Austri, të dyja kompanitë ndërmorën tërheqjen e tyre edhe në këto vende.
Autoritetet konfirmojnë lidhjen e mundshme me rastet e infektimit.
Zyra Federale për Sigurinë Ushqimore ka konfirmuar për mediumin “Schweiz heute” se është identifikuar një lidhje mes djathërave të butë të tërhequr nga tregu të kompanive Strähl Käse dhe Eberle Spezialitäten dhe rasteve të raportuara të listeriozës.
