Emilija Markoviq, kandidate e Listës Studentore, ka theksuar se programi i fitueses së zgjedhjeve në Serbi përfshin rishikimin e marrëveshjeve të arritura gjatë dialogut me Kosovën për normalizimin e marrëdhënieve.
Ajo iu përgjigj një pyetjeje të televizionit N1 në lidhje me angazhimet që Lista Studentore, e cila ka ardhur në pushtet pas zgjedhjeve të tetorit, do të vazhdojë t’i respektojë. “Ne ende nuk i kemi marrë detyrat e pushtetit plotësisht dhe nuk e dimë saktësisht se çfarë është nënshkruar.
Por, brenda asaj që do të gjejmë se është arritur ose nënshkruar, do të kërkojmë mundësi: ku dhe si mund të veprojmë, çfarë duhet të rishikojmë.
Por, mbi të gjitha, do të ngulim këmbë në respektimin e Kushtetutës dhe ligjshmërisë së Serbisë”, tha ajo.
Qëndrimi i Listës Studentore është se në lidhje me Kosovën, do të veprojnë sipas Kushtetutës së vendit, sipas së cilës “Kosova është pjesë përbërëse e Serbisë”.
Bashkimi Evropian ka theksuar se ndryshimi i pushtetit në Serbi nuk ndikon në detyrimet që ky shtet ka në procesin e normalizimit të marrëdhënieve me Kosovën.
Kjo përfshin angazhimet që rrjedhin nga Marrëveshja e vitit 2023 për rrugën drejt normalizimit dhe Aneksi për zbatimin e saj.
Në këtë marrëveshje, Serbia është zotuar se do ta respektojë integritetin territorial të Kosovës dhe nuk do ta pengojë anëtarësimin e saj në organizata ndërkombëtare.
Nga ana tjetër, Kosova ka pranuar ta formojë Asociacionin e komunave me shumicë serbe, i cili do t’i mundësonte këtij komuniteti një nivel të caktuar të vetëmenaxhimit.
Markoviq vlerësoi se pushtetin e ri në Serbi e presin bisedime serioze me përfaqësuesit e bashkësisë ndërkombëtare lidhur me dialogun mes Beogradit dhe Prishtinës, por tha se “këto bisedime kësaj radhe duhet të nisin nga disa baza të tjera”. “Vetë programi studentor ka paragjykuar disa çështje, përkatësisht se pikënisje duhet të jenë Kushtetuta e Republikës së Serbisë dhe parimet themelore të së drejtës ndërkombëtare”, tha ajo.
Kosova ka theksuar qëndrimin e saj të qartë për formimin e Asociacionit të komunave me shumicë serbe, duke theksuar se është e nevojshme që Marrëveshja për rrugën drejt normalizimit të nënshkruhet për të garantuar zbatimin e saj.
Bashkimi Evropian ka bërë të ditur se kjo marrëveshje është ligjërisht e detyrueshme për të dyja palët, edhe pse nuk është nënshkruar.
Përveç nënshkrimit të marrëveshjes, Kosova kërkon edhe ekstradimin e Milan Radoiçiqit dhe pjesëtarëve të tjerë të grupit të armatosur që realizuan sulmin në Banjskë në vitin 2023. “Gjithashtu duhet të tërhiqet letra e ish-kryeministres së Serbisë, Ana Bërnabiq, të cilën ajo ia kishte dërguar Brukselit”, thuhet në përgjigjen e Qeverisë së Kosovës.
Në këtë letër, Bërnabiq kishte deklaruar se Marrëveshja për rrugën drejt normalizimit dhe Aneksi për zbatimin e saj janë të pranueshme vetëm në një kontekst që nuk nënkupton njohjen de facto dhe de jure të Kosovës.
Nga Lëvizja Studentore nuk kanë pranuar të komentojnë këto kërkesa të Kosovës, duke theksuar se do të jetë Qeveria e re ajo që do të japë përgjigje pas shqyrtimit të dokumenteve.
Markoviq ka përsëritur se nuk do të ketë bashkëpunim me Listën Serbe, partinë kryesore të serbëve në Kosovë.
Ajo ka sqaruar se, nëse ndodh nevoja, drejtuesit e rinj të emëruar do të bashkëpunojnë me përfaqësuesit lokalë.
Lista Serbe ka nëntë nga dhjetë ulëset e rezervuara për serbët në Kuvendin e Kosovës dhe udhëheq të dhjetë komunat me shumicë serbe.
Sa i përket bashkëpunimit me përfaqësuesit e serbëve në institucionet qendrore të Kosovës, kandidati i Listës Studentore, Jugosllav Gashiq, tha se do të zhvillohet komunikimi përmes bashkësisë ndërkombëtare.
Ai theksoi gjithashtu se Lista Studentore nuk është parti politike dhe se nuk do të krijojë infrastrukturë partiake në Kosovë. “Ne nuk do të kemi absolutisht asnjë strukturë në terren që do të funksiononte si parti politike”, tha ai për RTV Vojvodina.
Lista Serbe, pas fitores së Listës Studentore në Serbi, shprehu shpresën se bashkëpunimi institucional me Beogradin do të vazhdojë.
Burimi origjinal i informacionit: zeri .info
