Rasti i sulmit ndaj Merab Dvalishvilit në hollin e një hoteli në Abu Dhabi ka tërhequr vëmendjen e mediave, dhe tani është zbuluar identiteti i djalit që qëndroi pranë tij gjatë incidentit.
Ai është Saba Lazishvili, një 21-vjeçar gjeorgjian dhe vëllai më i vogël i ish-luftëtarit të UFC-së, Zviad Lazishvili.
Identiteti i Saba Lazishvilit u bë i njohur një ditë pas ngjarjes, falë një postimi nga gazetari gjeorgjian Giorgi Kokiashvili në profilin e tij në platformën X. “Ky djalë është Saba Lazishvili, vëllai më i vogël 21-vjeçar i (ish-luftëtarit të UFC-së) Zviad Lazishvili, një mundës që nuk ka goditur kurrë me grusht në jetën e tij,” shkroi Kokiashvili.
Merab Dvalishvili në një postim në rrjetet sociale shpjegoi se ishte duke dhënë një intervistë për RAF në hollin e hotelit kur Usman Nurmagomedov dhe disa miq të tij iu afruan dhe filluan ta sulmonin.
Dvalishvili theksoi se ai dhe Saba ishin vetëm në Abu Dhabi, ndërsa grupi i Nurmagomedov përbëhej nga rreth 20 persona.
