Liverpooli përjetoi një humbje të dhimbshme 1-0 ndaj Arsenalit, e cila u ndikua nga një vendim i gabuar i gjyqtarëve.
Paneli i Incidenteve Kyçe të Ndeshjeve (KMI) të Ligës Premier ka konfirmuar se skuadra e drejtuar nga Arne Slot duhej të merrte një penallti pas një ndërhyrjeje të Jurrien Timber ndaj Alexander Isakut.
Rasti kontrovers ndodhi në minutën e 21-të të ndeshjes që u zhvillua më 1 nëntor në “Anfield”.
Gjatë një aksioni sulmues, Timber e kapi nga fanella sulmuesin suedez, i cili ishte duke u përpjekur të arrinte një krosim nga krahu i djathtë.
Pavarësisht kontaktit të dukshëm, gjyqtari Andy Madley nuk akordoi penallti, ndërsa VAR-i, me Stuart Attwellin përgjegjës, vendosi të mos ndërhynte.
Sipas raportimeve, paneli i KMI-së votoi me katër vota pro dhe një kundër se Liverpoolit duhej t’i jepej penallti në fushë.
Po ashtu, me tri vota pro dhe dy kundër, paneli vlerësoi se VAR-i duhej të kishte ndërhyrë dhe ta thërriste gjyqtarin për të rishikuar rastin në monitorin pranë fushës.
Dy anëtarë të panelit kishin një mendim ndryshe, duke e konsideruar ndikimin e tërheqjes së fanellës ndaj Isakut si subjektiv, dhe se VAR-i nuk kishte arsye të ndërhynte.
Megjithatë, shumica e anëtarëve e panë rastin si një gabim të qartë dhe të dukshëm.
Paneli ishte unanim vetëm në një pikë tjetër: Timber nuk duhej të ndëshkohej me karton të kuq për mohimin e një mundësie të pastër për shënim, pasi rasti nuk i plotësonte kriteret për një përjashtim të tillë.
Pas ndeshjes, trajneri i Liverpoolit shprehu kritika ndaj vendimeve të gjyqtarëve, duke theksuar se Isak kishte qëndruar në këmbë pavarësisht tërheqjes së fanellës. “Është e qartë se ai po ia mbante fanellën.
Alex ishte përpara tij dhe po përpiqej të godiste me kokë drejt portës, por nuk mundi sepse ia kapi fanellën,” ishte komenti i trajnerit të Liverpoolit.
