Mbrëmjen e së dielës, producenti i njohur Shkumbin Nebihu, i njohur si Bini Diez, ka përjetuar një incident të rëndë në lagjen Qershia të Prishtinës, ku është sulmuar nga reperi Don Xhoni dhe disa persona të tjerë.
Sipas burimeve, ngjarja ka ndodhur rreth orës 19:00, teksa Bini Diez po udhëtonte me veturën e tij Audi A8. Në atë moment, një veturë tjetër i ka bllokuar rrugën, brenda së cilës ndodheshin Don Xhoni dhe vëllai i tij, Leonard Isufi.
Ata dyshohet se kanë tentuar t’i hapin derën producentit, ndërsa njëri prej tyre ka goditur xhamin e veturës, dyshohet me armë zjarri. Ngjarja ka krijuar panik, pasi në veturë gjendej edhe familja e Binit.
Vetë Bini Diez ka deklaruar se gjatë incidentit është përdorur armë, por ai ka arritur të largohet i palënduar dhe më pas është paraqitur në polici për të raportuar rastin.
“Është bërë sulm ndaj meje padrejtësisht. M’u ka dëmtuar vetura nga Don Xhoni. Nuk kam pasur asgjë me atë person. Kam qenë me familje, është përdorur armë – me revole më kanë dalë përpara. Nuk jam lënduar, jam larguar me makinë. Tash jam në polici”, ka thënë Bini Diez.
