Shqipëria po përballet me një fenomen gjithnjë e në rritje, ku në shumicën e qarqeve regjistrohen më shumë vdekje sesa lindje.
Edhe në tremujorin e tretë të këtij viti, 7 nga 12 qarqe kanë rezultuar me bilanc natyror negativ.
Korça ka shënuar rekordin më të keq, ndërsa Tiranë paraqitet me një situatë më pozitive.
Sipas të dhënave nga INSTAT, gjatë tremujorit të tretë të vitit 2026, në Shqipëri janë regjistruar 5.787 lindje dhe 5.045 vdekje.
Në nivel vendi, bilanci natyror ka rezultuar pozitiv me 742 lindje më shumë se vdekje.
Megjithatë, krahasuar me të njëjtën periudhë të një viti më parë, lindjet kanë rënë me 10,5%, ndërsa vdekjet janë rritur me 0,4%.
Këto shifra pasqyrojnë zhvillime demografike si emigracioni, numri i ulët i lindjeve dhe ndryshimet në strukturën e popullsisë, faktorë që ndikojnë në numrin e njerëzve që jetojnë në vend dhe në raportin mes lindjeve dhe vdekjeve.
Shpërndarja sipas qarqeve tregon se kjo prirje nuk është e njëjtë në të gjithë vendin.
Tirana kryeson në numrin e lindjeve me 2.708 foshnje, por gjithashtu ka numrin më të lartë të vdekjeve, me 1.328 raste.
Si rezultat, kryeqyteti regjistron shtesën më të lartë natyrore me 1.380 lindje më shumë se vdekje.
Nga ana tjetër, Korça ka bilancin më negativ, me 220 vdekje më shumë sesa lindje, ndërsa Gjirokastra regjistron numrin më të ulët të lindjeve, vetëm 66.
Në krahasim me tremujorin e tretë të vitit të kaluar, 10 qarqe kanë shënuar rënie të lindjeve, me tkurrjen më të madhe në Fier, që arrin 20,1%.
Ndërkohë, Dibra ka shënuar rritjen më të lartë me 3,9%.
Sa i përket vdekjeve, numri i tyre është rritur në 7 qarqe, ku Kukësi ka regjistruar rritjen më të madhe me 15,7%, ndërsa Dibra ka shënuar rënien më të madhe me 17,8%.
Për të nxitur lindjet, qeveria ka rishikuar skemën e bonusit për bebet duke ndryshuar mënyrën e mbështetjes financiare për familjet.
Do të mbetet për t’u parë nëse këto ndryshime do të sjellin efektin e pritur.
Burimi origjinal i informacionit: zeri .info
