Komisioni Qendror i Zgjedhjeve (KQZ) ka bërë të ditur se ka filluar procesin e tërheqjes së pakove me fletëvotime që kanë ardhur nga jashtë Kosovës.
Bëhet fjalë për fletëvotimet e dërguara nga shtetasit e Kosovës që kanë votuar përmes postës në raundin e dytë të zgjedhjeve për kryetarë të 18 komunave të vendit.
Sipas njoftimit zyrtar, tërheqja e pakove po bëhet nga kutitë postare të KQZ-së në 22 shtete të ndryshme, ndërsa pas ardhjes në Kosovë, ato do t’i nënshtrohen procesit të vlerësimit dhe numërimit në Qendrën e Numërimit dhe Rezultateve (QNR).
Gjatë periudhës së regjistrimit, numri i shtetasve që janë regjistruar për të votuar me postë në këtë raund të dytë është 29,725 votues.
Ky proces pritet të përmbyllet në ditët në vijim, pas çka KQZ do të publikojë rezultatet përfundimtare të votimit nga diaspora.
