Deklaratat e reperit Nichi lidhur me periudhën e tij nën menaxhimin e Bini Diez kanë gjetur përgjigje nga ky i fundit, i cili ka reaguar publikisht përmes një njoftimi të DIEZ Production.
Gjatë një bisede me Vjollca Haxhiun në shtëpinë e Big Brother VIP Kosova 5, Nichi rrëfeu se në fillim paguhej vetëm 20 euro në javë dhe se kishte kaluar nëpër vështirësi të mëdha financiare.
Ai tregoi se, në disa raste, kishte dërguar ish-menaxherit fotografi të frigoriferit të zbrazët për t’i ilustruar gjendjen e tij të vështirë.
Reperi pretendoi gjithashtu se nuk ishte lejuar të punonte në vende të tjera për të siguruar të ardhura shtesë.
Pas këtyre deklaratave, Bini Diez paraqiti versionin e tij të ngjarjeve, duke thënë se kishte investuar më shumë se 60 mijë euro në zhvillimin e karrierës së Nichit brenda një viti.
Sipas tij, marrëveshja mes tyre ishte e ndarjes së fitimeve nga projektet muzikore, por kompania nuk kishte përfituar të ardhura nga ky bashkëpunim.
Ai theksoi se kontrata nuk e obligonte të paguante reperin me një shumë fikse mujore apo t’i mbulonte shpenzimet personale, megjithatë ai pretendon se e kishte ndihmuar edhe përtej angazhimeve profesionale.
Në reagimin e tij, ish-menaxheri foli gjithashtu për projektet e planifikuara gjatë bashkëpunimit, duke bërë të ditur se nga shtatë projekte të parashikuara, gjashtë ishin realizuar, ndërsa njëri kishte mbetur i papërfunduar.
Sa i përket këngës diss ndaj Don Xhonit, për të cilën Nichi foli gjithashtu brenda shtëpisë, Bini Diez pretendon se ajo ishte zgjedhje artistike e vetë reperit dhe se tekstin e kishte shkruar ai.
Burimi origjinal i informacionit: telegrafi .com
