Kryeministri i Kosovës, Albin Kurti, ka vizituar sot Fushë Kosovën, pas rezultateve të zgjedhjeve lokale që konfirmuan fitoren e Lëvizjes Vetëvendosje në këtë komunë. Në një video të shpërndarë pas vizitës, Kurti ka përshkruar me krenari rrugëtimin e subjektit të tij politik ndër vite, duke e cilësuar këtë si një dëshmi të forcës dhe mbështetjes në rritje të qytetarëve.
“Këto janë zgjedhjet e katërta ku Vetëvendosja merr pjesë për komunat e Kosovës. Në vitin 2013 morëm pjesë për herë të parë dhe fituam një komunë. Në vitin 2017 fituam tri komuna, në vitin 2021 katër, ndërsa tani, në vitin 2025, kemi fituar shtatë komuna,” – tha Kurti.
Ai shtoi se përveç komunave ku Vetëvendosja ka qeverisur gjatë katër viteve të fundit — Podujevën, Shtimen, Kamenicën dhe Gjilanin — partisë i janë shtuar edhe tri të tjera: Fushë Kosova, Kastrioti dhe Mitrovica.
“Katër komunat ku kemi qeverisur i kemi mbajtur fuqishëm, me mbështetje shqiptare, ndërsa tani iu kemi shtuar edhe tri të reja. Ky është një rezultat i punës, përkushtimit dhe besimit që qytetarët po na japin çdo herë e më shumë,” – theksoi kryeministri Kurti.
Vizita e tij në Fushë Kosovë u prit me entuziazëm nga mbështetësit e Vetëvendosjes, ndërsa Kurti e quajti këtë fitore një sinjal të qartë se qytetarët duan ndryshime të vazhdueshme dhe qeverisje me integritet.
