Këngëtarja e njohur shqiptare, Jonida Maliqi, ka ndarë një rrëfim emocionues për djalin e saj, Danin, i cili është diagnostikuar me çrregullim të spektrit të autizmit.
Ajo ka folur hapur për sfidat, paragjykimet dhe përparimin e tij ndër vite.
E ftuar në emisionin “Goca dhe Gra” në Top Channel, Maliqi ka treguar për rrugëtimin e të birit, vështirësitë që ka përjetuar si nënë, si dhe për përvojën e dhimbshme me psikologen që e kishte vlerësuar fillimisht gjendjen e djalit.
Ajo shprehet se mëmësia e ka bërë të zbulojë një forcë të papritur, duke theksuar se Dani e ka ndikuar thellësisht në mënyrën si e sheh jetën. “Nuk e kam imagjinuar asnjëherë që kisha një forcë kaq të madhe, nuk e dija se do të çaja malet për të.
Ai më ka përsosur si qenie. Është adoleshent, kemi pasur rrugëtim të bukur me ulje dhe ngritje.
Më kishin thënë se adoleshenca do të ishte e vështirë, por falë Zotit ai ka pasur shumë progres.
Merr dashurinë e prindërve dhe gjyshërve dhe të gjithë jemi aty për të,” rrëfeu këngëtarja.
Maliqi tregoi se që në fillim kishte vërejtur se djali i saj zhvillohej ndryshe nga fëmijët e tjerë, por pranimi i situatës para të tjerëve kishte qenë një proces i vështirë.
Ajo kujtoi një përvojë të hidhur nga fundi i vitit 2015, kur ishte drejtuar te një psikologe për të kërkuar ndihmë dhe orientim.
Sipas saj, pas vetëm gjysmë ore konsultimi, kishte marrë komente të rënda lidhur me aftësitë e saj si prind dhe të ardhmen e djalit.
Psikologia i kishte thënë se Dani nuk do të fliste kurrë dhe nuk do të arrinte të socializohej.
Kjo përvojë ishte një goditje e madhe emocionale për të dhe familjen e saj.
Më pas, ata vendosën të kërkojnë ndihmë në një qendër tjetër, atë të Liri Berishës, ku Dani u trajtua me mbështetje nga një ekip prej pesë mjekësh.
Sot, sipas këngëtares, rezultatet e këtij rrugëtimi janë të dukshme: Dani flet dy gjuhë dhe ndjek shkollën.
Jonida nuk ngurroi të kritikojë psikologen e parë, Anjeza Dishnica, duke e cilësuar të papranueshme mënyrën se si një profesionist shëndetësor komunikon me prindërit. “Turp të kesh, sepse një prindi, sido që të jetë fëmija i vet, nuk i komunikohet në këtë mënyrë.
Ishte mënyra më bastarde e mundshme, e bërë për më tepër nga një mjek,” deklaroi ajo.
Gjatë intervistës, këngëtarja foli gjithashtu për raportin me ish-bashkëshortin dhe procesin gjyqësor pas ndarjes së tyre.
Ajo shpjegoi se fillimisht kishte dëshiruar që gjithçka të zgjidhej me marrëveshje dhe larg vëmendjes publike, por procesi mori një drejtim tjetër dhe çështja u bë publike, duke e detyruar të përballej me vëmendjen e mediave.
Maliqi tha se i ka lënë çështjet në duart e drejtësisë, por theksoi se prioriteti i saj mbetet mirëqenia e të birit. “Djali im është epiqendra dhe nuk ka munguar asnjëherë komunikimi sa i përket djalit.
Kam kërkuar gjithmonë gjuhën e duhur për të komunikuar dhe nuk e kisha marrë me mend kurrë që do të flisja sot për këtë.
Shpresoj që një ditë të gjejmë gjuhën e duhur dhe t’i hapim rrugë një zgjidhjeje,” u shpreh ajo.
Në fund, Jonida theksoi se nuk do të hezitojë të flasë publikisht nëse mendon se të drejtat e djalit të saj cenohen, duke siguruar se çdo vendim dhe përpjekje e saj do të vazhdojë të ketë në qendër Danin.
Burimi origjinal i informacionit: telegrafi .com
